दुर्दैवी घटना:जीपचे टायर फुटून सांगोला-जत रोडवर सोनंद जवळ झालेल्या अपघातात तीन महिला मजुरांचा मृत्यू
सांगोला : अथणी ( कर्नाटक ) येथील महिला मजुरांच्या जीपचा टायर फुटून सांगोला-जत रोडवर सोनंद जवळ झालेल्या अपघातात ३ महिलांचा दुर्दैवी मृत्यू झाला.
अपघाताबाबत अधिक माहिती अशी की, कर्नाटकातील अथणी येथील महिला मजूर आज सकाळी पंढरपूर तालुक्यात द्राक्ष बागेत काम करण्यासाठी जात होत्या. दरम्यान, जत-सांगोला रोडवर जीपचे पाठीमागील चाक फुटल्याने जीप पलटी झाली. जीप पलटी झाल्याने जीपमधील महिला बाहेर फेकल्या गेल्या. यामध्ये तीन महिलांचा जागीच मृत्यू झाला आहे. या घटनेत यावेळी नऊ महिला जखमी झाल्या असून दोघींची प्रकृती गंभीर असल्याने त्यांना पुढील उपचारासाठी मिरजला हलविले आहे. मृत व जखमी महिला या बेळगांव जिल्ह्यातील अथणी तालुक्यातील ममलाद व बळोग्री या गावातील असल्याचे समजते. महिला मजुर कामाला जात असताना काळाने त्यांच्यावर घाला घातल्याने या दोन्ही गावावर शोककळा पसरली आहे.
